ગુજરાતમાં મેઘમહેર યથાવત! હવામાન વિભાગે 10 સપ્ટેમ્બર સુધી ભારે વરસાદની આગાહી કરી છે. દાહોદ, પંચમહાલથી લઈને સૌરાષ્ટ્ર સુધી ધોધમાર વરસાતની ચેતવણી, વીજળી-પવન સાથે તોફાની વાતાવરણ. જાણો તમારા જિલ્લાના વરસાદી અપડેટ્સ અહીં જ.
ગુજરાતના આકાશમાં મેઘમાળા હજુ યથાવત છે અને વરસાદની ઝાપટો સતત વરસી રહ્યાં છે. હવામાન વિભાગે તાજેતરમાં સ્પષ્ટ કર્યું છે કે 10 સપ્ટેમ્બર સુધી રાજ્યમાં ગાજવીજ સાથે વરસાદ ધોધમાર પડશે. આજે જ રાજ્યના 71 તાલુકામાં વરસાદનું આગમન નોંધાયું છે, જેમાં કેટલીક જગ્યાએ તો ભારે વરસાતથી લોકોની દૈનિક જિંદગી પ્રભાવિત થઈ છે.
આજના આંકડા મુજબ દાહોદ જિલ્લાના સિંગવડમાં સૌથી વધુ 2.28 ઈંચ વરસાદ પડ્યો છે. અમદાવાદના દેત્રોજ વિસ્તારમાં 1.54 ઈંચ, દાહોદ શહેરમાં 1.33 ઈંચ અને વલસાડમાં 1.22 ઈંચ વરસાદ નોંધાયો. મોરવાહડફ, લીમખેડા અને ઉમરપાડા જેવા તાલુકામાં એક-એક ઈંચ વરસાદ વરસ્યો છે જ્યારે ગળતેશ્વર અને ગરબાડા વિસ્તારમાં પોણા ઈંચ જેટલો વરસાદ થયો છે.
અંબાલાલ પટેલની આગાહી – ઉત્તર ગુજરાત પર ઘેરાશે કાળા વાદળો
પ્રખ્યાત હવામાન વિશ્લેષક અંબાલાલ પટેલે તોફાની આગાહી કરી છે. તેમના અનુમાન મુજબ ઉત્તર ગુજરાતના કેટલાય જિલ્લાઓમાં ભારે થી અતિભારે વરસાદની સ્થિતિ સર્જાશે. બંગાળના ઉપસાગરમાં એક પછી એક મોસમી સિસ્ટમ સક્રિય થઈ રહી છે, જેના પગલે 3 સપ્ટેમ્બરથી 9 સપ્ટેમ્બર વચ્ચે વરસાદનું તાંડવ જોવા મળશે. સૌરાષ્ટ્રના વિસ્તારોમાં પણ આ પ્રલયકારી વાદળો ઘેરાશે અને જામનગર, મોરબી, ચોટીલા, સુરેંદ્રનગર, ધ્રાંગધ્રા સહિતના વિસ્તારોમાં ધોધમાર વરસાતનો ખતરો વ્યક્ત થયો છે. પંચમહાલ અને મહીસાગરમાં તો અતિભારે વરસાદની ચેતવણી આપવામાં આવી છે.
ભારે વરસાત સાથે પવનનો પ્રહાર
દાહોદ, પંચમહાલ, મહીસાગર અને સુરેન્દ્રનગર જિલ્લામાં છૂટાછવાયા વિસ્તારોમાં પવનની ઝડપ 41 થી 61 કિમી પ્રતિ કલાક સુધી પહોંચી શકે છે. આ તોફાની પવન સાથે જ 15 mm/hr કરતાં વધુ વરસાદ વરસવાની સંભાવના છે. વીજળી પડવાની શક્યતા 60% થી વધુ હોવાથી ગામડાંઓથી લઈને શહેર સુધી લોકોને સતર્ક રહેવાની જરૂર છે. આવા ભારે વરસાતને કારણે રસ્તાઓ અવરોધિત થઈ શકે છે, નીચાણવાળા વિસ્તારોમાં પાણી ભરાઈ જવાની પૂરી શક્યતા છે, તેમજ ટ્રાફિક જામ સર્જાઈ શકે છે.
મધ્યમ વરસાદની ચેતવણી
બનાસકાંઠા, પાટણ, મહેસાણા, સાબરકાંઠા, અરવલ્લી, ગાંધીનગર, ખેડા, અમદાવાદ, આણંદ, બોટાદ, ભાવનગર, વડોદરા, છોટાઉદેપુર, ભરૂચ, મોરબી, રાજકોટ, અમરેલી અને કચ્છ જિલ્લામાં 40 કિમી પ્રતિ કલાકથી ઓછી ઝડપે પવન સાથે મધ્યમ વરસાદ નોંધાઈ શકે છે. અહીં 5 થી 15 mm/hr જેટલો વરસાદ વરસવાની શક્યતા છે. વીજળી પડવાની સંભાવના 30% થી 60% સુધી દર્શાવવામાં આવી છે. આ પ્રકારના વરસાતથી પણ નીચાણવાળા વિસ્તારોમાં પાણી ભરાઈ શકે છે અને જીવનશૈલી પ્રભાવિત થઈ શકે છે.
હળવો વરસાદ પણ યથાવત
જામનગર, દેવભૂમિ દ્વારકા, પોરબંદર, જૂનાગઢ, ગીર સોમનાથ, સુરત, નર્મદા, તાપી, ડાંગ, નવસારી, વલસાડ, દીવ, દમણ અને દાદરા અને નગર હવેલી જેવા વિસ્તારોમાં છૂટાછવાયા સ્થળોએ હળવો વરસાદ થવાની શક્યતા છે.
ગુજરાતના આકાશમાં અત્યારે વીજળીના તડાકા અને વરસાદી ઝાપટાની રમઝટ ચાલુ છે. લોકો માટે ચેતવણી સ્પષ્ટ છે – સાવચેતી જ સુરક્ષા. આ વરસાદી તબક્કો અનેક વિસ્તારો માટે રાહત સાથે પડકારો પણ લાવશે. 🌧️